أغاني البنات بين الأحلام والمغص

أغاني البنات بين الأحلام والمغص



اغاني البنات هي اغنيات مستوحاة من الواقع الاجتماعي السوداني وتعكس هذه الاغنيات قيم ومفاهيم هذا المجتمع وتغيراته الاقتصادية والاجتماعية والسياسية والثقافية كما قال الاستاذ الطيب محمد الطيب رحمه الله اذا سقطت حبة خردل في المجتمع وجدتها في اغاني البنات.

هذه الاغاني مجهولة المؤلف والملحن وتاتي بتلقائية في كلمات بسيطة مالوفة ومن صميم اليوميات العادية ومعظم الحان وكلمات هذه الاغاني على وتيرة واحدة ولكن قد يحصل تطور مع تطور المجتمع واحداثه ويتغلب عليها ايقاع التمتم .

مثال ايام الاستعمار اغنيات تحمل مظهر تاريخ الاستعمار :-

المهيرة مهيرة القصيص --
انتي ملكة والحرص انجليز
حكومة يا عروسنا
عريسك غلبوا الثبات

المهيرة مهيرة السرور
انتي ملكة والحواليك زهور
حكومة يا عروسنا
عريسك غلبوا الثبات

ومواكبة للاحداث السياسة ايام ثورة اكتوبر ..

رصاصة القرشي تقع فيني
وبقميص القرشي يكفنوني
وجنب القرشي يدفنوني

على عهد مايو وجعفر نميري:

يا الله يا رحمن
اب عاج مالو زعلان
يا تيلة الانصاص
وفي الرقبة خايلة خلاص
قال لي وزيركم مين -
خالد حسن عباس
يا الرايق
وجري دمعي بالمايك

وين وين يا ناس وينو
العريس ود ناس وينو

يا عسكري وينو
ما تزدري
الشعب قال
عاوز ازهري
وعلم السودان
رفعو ازهري

***

دي الحكومة يا ناس
دي مضمونة يا ناس
ما بخونة الصادق
مسك الحكومة يا ناس

بلالي بلالي
بلالي يا السادة وا ناري
انا يا بلالي

بلالي بلالي يا الله
بلالي نزور بلاد برة
بلالي نركب الطايرة
بلالي في موسكو ندلي

بلالي رسلت جوابين
بلالي والرد يجيني متين
بلالي والرد يجيني متين
بلالي والثانية بسنتين

بلالي يا شجر الاراك
بلالي يا القلبي حباك
بلالي يا القلبي حباك
بلالي ما ببقي براك

بلالي وغنيلو يا ابوحميد
بلالي والزول شبيه الصيد
بلالي والزول شبيه الصيد
بلالي ولاقيتو يوم العيد .. انا يا بلالي

هناك اغاني تحمل احلام وتطلعات الفتيات في مجتمع لا زال صوت المراة فيه مرفوضا ولازالت الهيمنة الذكورية والقمع الابوي يسيطران علي حركة المراة

عليك اللة يا يا با
ما تقول ليهو لا

ابو لي بي يا اللبن ابولي بي
امي قالت دققي وختي
لامن ابوكي يجي
قت ليها لا
ابوي مابرجا
بسوي عوسي برا
كان في قعر شدرة

امي قالت لي
اخدي ود العم
قت ليها لا
اريته بالعمم
العيشتو كلها هم

امي قالت لي
اخدي ود الجد
قت ليها لا
اريته بالجدد جدد
العيشتو كلها حد

امي قالت
اخدي ود الخال
قت ليها لا
اريتو بي الخلالي
الديمة مكشوف حا ل

حبيبي سيد الناس ضو القمر با الليل

قديما كان فارس الاحلام هو ذلك المتعلم المثقف الواعي فظهرت اغاني للمتعلمين

ناري انا
والمهندس جاء ورسم البناء
الله لي يا الله
والدكاترة ولادة الهنا

سايق العظمة سافر
خلاني وين
يا الماشي لي باريس
جيب لي معاك عريس
شرطا يكون لبيس
من هيئة التدريس

ونتيجة للتغيرات التي حصلت وادت الي تلاشي الطبقة المتوسطة وبالتالي تغيرت مواصفات فارس الاحلام:

المدرسين بري منهم
المفلسين بري بري منهم
اولاد العز
اولاد راحات
سايقين عربات
اخر موديلات

ومع ظهور الاغتراب اصبح هو الحلم الذي يسعي اليه الكل وارتفعت اسهم المغترب

المغتربين ازيكم
لعلكم طيبين في حيكم

حرق دمي وفؤادي
دا القام ليبيا بنغازي
فراقو صعب علي

انا لي حبيب في اليمن السعيد
في الكويت انا زولي ما جاء
والحج البيت انا زولي ماجاء

رسل لي دي برقية-
ابوظبي دولة عربية يا ناس

لما الطايرة قامت
ارتفعت فوق شوية
دي السحبت حمادة-
الله كريم علي

قال لي ما تبكي
كان حي بعود وبجي - بجيك انا يا عينيا

مغترب كان كديس كان كلب

واتت الاغنية المشهورة

مغص مغص يا العزابة*
بس تموتوا مغص يا العزابة

البنات حلوات يا العزابة
كالشموس طالعات يا العزابة
للعرس راجيات يا العزابة
انحنا مادايرين يا العزابة
الا مغتربين يا العزابة

هذه الاغنية ادت الي احباط الشباب المحلي ولترضيتهم استبدلت كلماتها

فرح يا فرح يا العزابة
عيشوا حب ومرح يا العزابة

انتوا يا الزينين يا العزابة
للوطن حارسين
ليه تهاجروا سنين يا العزابة
وتبقوا مغتربين يا العزابة

وبعد داك المغتربين ذاتم بقوا نوعين .. نوع اصلي ناس الخليج والسعودية

***
يا ابوظبي
ويا بلد النبي
ويا نقعد كدي

نوع تايواني ناس ليبيا واليمن (ههههههه) لأنو ليبيا واليمن تعتبران "ضياع زمن"

ومع التغييرات التي حصلت وظهور الهجرة الي دول العالم الاول، اصبح المهاجر عملة نادرة مرغوبة يتمناها الكل

دبلوماسي
لاجئ سياسي
طلبوا قاسي
اخير ليك انا تعال لي انا

الليلة وين يا ناس يا ود البلد
ارحك كندا ناس كندا احلي الناس
هم اظرف ناس يا ود البلد

ومع ثوره الانقاذ ظهرت اغاني مثل

يمة انا زولي ماجاء يا يمة انا زولي ماجاء
في توريت انا زولي ما جاء
يا المات شهيد انا حالتي راجية
اتحجب والبس طويل
عشان اعرس عمر البشير

بري بري ح
بيبي لا جنجويد لا عسكري
دا زول فاهم ورضي


الكوز مريش الكوز بعيش
حبيبي ظريف
يا ناس الكوز لطيف يا ناس

وفي الاونه الاخيره نجد أن الزواج مثلاً قد بات يشكل هاجساً لدى الكثيرات حتى أنهن قد بتن يفضلن من هو متزوج على عدم الزواج فظهرت أغاني مثل:

جاياك جاياك يا ابشرا
جاياك سر بفته معاك يا ابشرا

مليت مليت يا ابشرا
مليت من قعاد البيت يا ابشرا

للحول للحول يا ابشرا
للحول باحثة لي عن زول يا ابشرا

يالطيف يا لطيف يا ابشرا
يا لطيف سعدي يبقي خفيف
بالضرا يا ابشرا
بالضرا انشاء الله راجل مرة

ثم ظهرت ...

راجل المرة حلو حلا

ولصيغة المبالغة:

بختي بختي
انشاء الله راجل اختي

تري كيف ستكون كلمات أغاني البنات المستقبل؟؟؟؟؟؟؟؟؟؟

منقول عن شبكة ومنتديات سوداني الحقوق محفوظة لهم